من عنق الزجاجة الي الجامعة

---

 

عزيزي القارئ او عزيزتي القارئة اي كان حضرتك مين فانت بالمكان الصحيح و اي كان مجموعك اي فتشرفنا بمعاليك يا فندم

مشهد منتشر ف معظم البيوت بعد نتيجة الثانوية العامة يا بنلقي لحظات من الفرح او بنلقي لحظات حزن و خيبات امل

انا انتهيت ! انا مستقبلي ضاع ! و حلمي ضاع ! و غيره من كلام مشابه يا بنقوله يا بنسمعه

طب و بعدين ؟!! هنا بيجي دورنا و اقدر اقولك ان مستقبلك لسه مبتداش عشان ينتهي لان حضرتك دلوقتى في الحاضر واقف عند لحظه معينه و هي لحظه النتيجه بكره ده احنا اللي لسه هنعمله ان شاء الله

ظهر المجموع اول حاجه اعملها اي ؟

نحمد ربنا علي النتيجة اي كانت انا عملت اللي عليا و تعبت و خدت نتيجة تعبي  و راضي بيها مفروض اكون وضعت من ١ الي ٥ كليات يكونوا مرضين بالنسبة لي و مجالاتهم مقبولة ليك و كل هدف من الخمس اهداف دول انا عارف انا هعمل فيه اي وخطواتي هتبقي ازاي و دارس الكليات دي يعني علي الاقل بصورة مبدأيه يعني بنسبه ٨٠% معملتش ده ابدأ اعمله بعد النتيجة

خلاص استقريت و دخلت الكلية استغل فتره الجامعة ازاي ؟!

---

اول حاجه لازم تعرف ان لو مستغلتش فتره الجامعة صح بعدها هتكون صعبه شويه و هتاخد وقت اطول و المسؤوليات زادت ففتره الجامعة هي فعلا زي ما قالوا اجمل ايام حياتك لو استغليتها صح و النقط دي هتوضح لك نعمل اي :

١. العلاقات: لازم تبقي دقيق اوي في اختيارك لأصدقائك بتوع الكلية لان دول غالبا اللي هيكملوا معاك بقيت عمرك و ياما يرجعوك ورا ياما يطلعوك قدام من الاخر صاحب ناس شبهك و ناس طموحه و عندها هدف مقارب ليك و اخلاقهم كويسه جدا لان زي ما بيقولوا الصاحب ساحب او الرفيق قبل الطريق

٢. الوقت: قسم وقتك و نظم نفسك بحيث ان مفيش تغطي علي حساب دراستك حياة الجامعة زي ما هي جميله و مفيدة مليئة بالمغريات و وقت مهدر بشكل كبير مهما كان مجال دراستك لو مستخدمتوش صح هتلقي نفسك خلصت و الحصيلة صفر زي ما نفسك ليها حق عليك ان يبقي في جانب ترفيهي زي ما بردوا عقلك ليه حق عليك بان تطوره و تنمي بالمعارف اللي تخليك مميز في حياتك و في سوق العمل بعد كده وطبعا ده مبني علي النقطة رقم واحد اللي هي علاقاتك و المحيطين بيك

٣. اللغات: مهم جدا جدا جدا يكون عندك أكثر من لغة و تسعي ان انت تتعلم لغات بعدد سنين دراستك يعني لو الكلية اللي دخلتها مثلا ٤ سنين يبقي تتعلم ٤ لغات بمعدل لغة كل سنه لو خصصت ساعه كل يوم  للغة هتبقي كافيه جدا ان تتقنها و الكورسات الاون لاين و الانترنت بقي موفر المجال لتعلم اي حاجه دلوقتي مش لازم يكون من خلال مراكز لغات الا لو في بعض الأشخاص مش بتفضل الاون لاين

طيب تعلم اللغة ده هيفيدني بايه؟

• هيزود المعرفة عندك بحيث انك تقدر تدور علي مراجع كتيره بلغات مختلفة في مجالك و تقرا عنه او حتي بعيدا عن مجالك ده بيزود معرفتك بثقافه البلاد اصحاب اللغات دي او القراءة في اي موضوع بأحد اللغات اللي تعلمتها مش هيكون صعب بالنسبة لك

• بتزود فرصتك في السفر و خاصه الناس اللي بتدور علي منح خارجيه فاللغة شئ أساسي خاصه لو المنحة دي لدوله اجنبيه

• بتفتح مجال عمل ليك و مصدر دخل بانك تشتغل في مواقع  ال freelancer  كمترجم اون لاين لاحد المؤسسات او الشركات و ده بيوفر عليك وقت ومجهود و مصدر دخل كويس ليك و انت مازالت طالب جامعي

٤. التطوع و الأنشطة الطلابية: شارك في الأنشطة الطلابية و اتعرف علي الأنشطة اللي بتقدمها الجامعة و المناسب ليك و تطوع في جمعيات خيريه علي الاقل سنه  ده بيزود ليك علاقات ممكن تفيدك بعد كده سواء علاقات عامه او علاقات صداقه غير الخبرات علي المستوي الشخصي و بتأثر و بتغير في شخصيتك بشكل كبير جدا

٥. الكورسات: اتعلم و خد كورسات في كل حاجه و خلي عندك خلفيه عن كل حاجه في مجالك و غير مجالك يمكن يتخلق لك فرصه بجانب دراستك تحب تكمل فيها هتقولي الكورسات مكلفه وعايزه فلوس كتير؟! هقولك الكورسات الاون لاين كتير جدا متوفرة علي الانترنت و اي مجال دلوقتي انت حابب تتعلم فيه هتلقي موفرين له بدل المصدر الف مصدر و اعرف ان الموبايل و الانترنت اللي في ايدك ده سلاح ذو حدين يقدر يكون معاك لصالحك او يقدر يكون ضدك

٦. soft skills : مهمه جدا جدا ان تكون عندك  لو حابب يكون ليك وظيفة كويسه و مرموقه في مكان محترم فلازم  يكون عندك مهارات كتير زي مهارات التواصل ازاي اتواصل مع الناس و الذكاء الاجتماعي و تقديري لذاتي و مهارات العرض ان اقدر اتكلم و اعرض فكرتي قدام عدد كبير دون رهبه مهارات حل المشكلات و العمل الجماعي و إدارة الوقت و ازاي اقدر اتفاوض مع الشخص اللي قدامي و ضبط النفس كل دي مهارات بسيطة و لكن لازم تكون موجوده عندك و تقدر توظفها في شغلك بشكل صحيح و العمل التطوعي و الأنشطة الطلابية بتكسبك جزء منها من غير ما تشعر لذلك بأكد علي الجانب ده

٧. الاجازات: لازم تستغل افضل استغلال اشتغل و جرب و اتعب و اتعلم يكون ليك مصدر دخل و اعتمد علي نفسي ده هيفيدك بان هيكون عندك خبرات و هتتعلم دروس من الحياة مبنخدهاش في الكورسات 😊

٨ . القراءة: ضرورة و لا تعد من الهوايات بمعني ان لزاما ان اقرأ ده اول حاجه انزلت علي النبي صلى الله عليه وسلم هي كانت ( اقرأ )  لان اللي مبيقراش يكاد يكون منعزل عن العالم و اقسم قراءتي ل ٣ اجزاء : جزء في مجال دراستي بنسبه ٥٠ % و جزء عن هواياتي بنسبه ٣٠ % و جزء عن مجالات مختلفة بنسبه ٢٠ % و ده لتزويد الثقافة العامة

٩ . السفر: لو توفرت ليك فرصه سفر كويسه سافر سواء داخل او خارج مصر سافر عشان تتعلم سافر عشان تعرف ثقافات جديده سافر عشان تعرف تتعلم تشيل مسؤولية نفسك و مفيش مانع للترفيه عن نفسك بردوا هجيب فلوس للسفر منين دنا لسه طالب ؟؟ لو قلت الجملة دي يبقي حضرتك ما قرأتش انا قلت اي فوق كل اللي قولته فوق يقدر يوفر لك فرص سفر بس ركز في الكلام كويس

١٠. علاقتك بالله: دي اخر نقطه و لكن من المفترض أن هي تكون اول نقطه قوي علاقتك بالله استغل شبابك في طاعة ربنا و اجعل الله نصب أعينك اتقي الله في عملك و في نفسك و عقلك و طور منها  اول حاجه يسأل عنه العبد هو العمر قال رسول الله صلى الله عليه وسلم ( لا تزول قدما عبد يوم القيامة حتّى يسأل عن أربع عن عمره فيما أفناه وعن جسده فيما أبلاه وعن علمه ماذا عمل فيه وعن ماله من أين اكتسبه وفيما أنفقه ) و مرحله شبابك لما تستغل بالطاعة ده اجمل شئ ، ربنا سبحانه و تعالي خص سبع يظلهم يوم لا ظل إلا ظله من ضمنهم شاب نشأ في طاعه الله ابسط الأعمال مقلتش ان تكون مذاكر العلوم الشرعية و مقيم في المسجد اهم حاجه العمل و صلاتك و كل ما تقدر عليه من عبادات و من ضمن العبادات العمل ف اعمل علي تطوير نفسك عشان توصل للقمة و تقدر تفيد غيرك و تذكر المرء علي دين خليله

---

اتمني تكونوا استفدتم و تذكر دائما انا الله لا يضيع اجر من احسن عملا تعبك هتخده دلوقتي او بعدين و لكن تيقن بأنه مش هيضيع الشهادة مجرد ورقه احنا اللي بنبنى نفسنا من اول يوم ياما نتركها او نستثمر فيها و افتكروا مهندس قاعد في البيت بشهادته افضل و لا محاسب اشتغل علي نفسه و وصل لمكان عالي احنا اللي بنصنع القمة و الثانوية مش نهاية العالم فقط اسعي و خذ بالأسباب و انتظر النتيجه بالتوفيق للجميع